قرب .... قرب ...قرب.....

قرب قرب قرب
والى ما يشترى يتفرج

فتحنا المزاد يا بهوات قولنا عاوز ايه وبكام وما عليك غير انك تقول هات وطلبك عندنا مجاب

قرب قرب قرب والى ما يشترى يتفرج

كل الاصناف والانواع والاشكال عندنا

قرب قرب واتفرج

طلبك ايه يا استاذ طلبك ايه يا هانم

اخلاق للبيع

ضمائر للبيع

نفوس للبيع

ويا بلاش اسعار ولا فى الاحلام تقولو علينا اتجننا تقولو علينا سارقنهم لاقينهم

المهم طلبك موجود يا حضرت

اخلاق .. ضماير .. نفوس .. زمم .. ومن كل الانواع

وبالسعر الى تحدده كمان وده عرض لفتره محدوده يا تلحق يا ما تلحقش

خد فكره واشترى حتى بعد بكره احنا فاتحين يا استاذ
قرب قرب واتفرج

- طلبك ايه يا باشا
- قلب لو سمحت وباى سعر

ادى البدايه ولا بلاش استفتحنا بالصلاه على النبى

عندنا كل انواع القلوب قلب مليح ... قلب جريح ... قلب صفيح ...
كله موجود يا حضرات

- وعاوز تدفع كام يا باشا
- يا عم زى ما يقطع المهم الحقلى يومين لحسن القلب الى معايا مكملش جمعتين وجاب اخره
- غالى والطلب رخيص يا بيه عندى قلب لشاب مكملش 25 ولسه بكر كمان ودى مش ها نحاسبك عليها يا باشا عشان انت اول استفتاح

( قصة الشاب صاحب القلب : خريج وسط ملايين من الى اتخرجو وحتى مكان على القهوه او الرصيف ملحقش ركب اول اتوبيس وعلى شرم الشيخ من مطعم لكافيتريا لبار لحد ما وقع فى كتكوته اجنبيه قالتله نتجوز وتسافر معايا على بلدى والى انته عاوزه ها تلاقيه هناك وبالفعل سافر واول ما وصل بيت الكتكوته شربو كاسين وكانت اخر حاجه يشربها واخر حاجه يشوفها الكاس الى فيه حبايتين منوم لحد ما نام صاحبنا ومقامش تانى وطلع من بيت الكتكوته على عياده واتقطع حتت ... ايوه حتت متستغربش دى قصه حقيقيه يعنى الكلاوى فى حته والقرنيه فى حته والشبكيه والنخاع ... والقلب الى اشتراه الزبون )

قرب قرب واتفرج

كله موجود حدد سعرك وخد بضاعتك والضمان لحد الموسم مايخلص ... ويا تلحق ... ياماتلحقش

- الى بعده
- والنبى يابنى انا عاوزه حتة عيل
- يا حاجه انتى تأمرى يعنى عاوزه ابن كام سنه كده
- يعنى لو سنتين تلاته يبقى انتى فعلا حققتلى حلمى
- ياه بس كده طلبك موجود هاتولها العيل الصغير الى جوه

( قصة العيل الصغير : بنت 16 سنه هربت من بيتها عشان جوز امها بيتحرش بيها ومن البيت للشارع رصيف يشيلها و خرابه تحطها لحد ما وقعت فى ايد واحده ست قابلتها بالصدفه فى الشارع اخدتها حمتها ونضفتها ولبستها ... من الاخر بان لونها الحقيقى الى كان قرب يختفى تحت اكوام من التراب والهباب يومين تلاته دلع لحد ما ظهر الوش الحقيقى للست دى وصاحبتنا لقت اتنين رجاله فى لحظه فى اوضتها تصرخ ايه وتصوت مين خلاص الى كان كان وقبل ما يمشو عدو على الست ودفعو تمن الى عملوه صاحبتنا لقت الحكايه كده هربت من عندها للشارع تانى بس الى حصل معداش كده ده فى عيل جاى تعمل ايه كملت الكام شهر دول فى الشارع لحد ما ولدت العيل ورمته قدام بيت ورجعت بيتها تانى وهيه ديتها ايه علقه محترمه من جوز امها او امها واهى الدنيا ها تمشى عادى يعنى لو قالتلهم انها اشتغلت الكام شهر دول عند الست الى قابلتها ..... وده العيل الى اشترته الزبونه )

قرب قرب قرب ... والى ما يشترى يتفرج

- والنبى ياجماعه بلاش زحمه واحد واحد وكله هايلاقى طلبه موجود الى بعدها
- ايوه يا ست الكل أأمرى طلب معاليكى ايه
- جوزى مزهقنى فى عيشتى وعاوزاه يروح فى ستين داهيه وألهف الى وراه بس وانا بعيد ... عندك طلبى ولا اشوف فى المعرض الى جمبكو
- هو طبعا انتى ممكن تشوفى فى اي حته بس مش ها تلاقى الضمنات الى احنا ها نقدمهالك ده غير اننا ها نقدملك كام اختيار كمان تنقى من بنهم وغير ده وده مش ها نقولك ها نفذ امته كمان عشان الصدمه تبقى بجد تحبى نبدأ ولا تدورى فى مكان تانى
- لا خلينا نجرب شغلكو حيث انك واثق اوى كده من بضاعتك
- حيث كده اولكش ياست الكل نلفقله قضيه محترمه ميخرجش منها غير بعد 10 او 15 سنه ايه رايك
- لا مهو بعد الكام سنه دول ها يطلعلى يقرفنى تانى شوف حاجه تانيه
- خمس ست بلطجيه يقابلوه فى الشارع ويدولو الطريحه الى هيه ميقومش منها الا بعاهه مستديمه يعنى عمى .. شلل .. يفقد الذاكره ... كده يعنى
- يوه لا لا مش عاجبنى الموضوع ده مهو انا ها افضل اجرى معاه على الدكاتره والمستشفيات متشوف حاجه من الاخر وخلصنى
- يبقى انتى مخلتيليش غير حل واحد ايه رايك يمشى معاكى
- كده يبقى انت فهمتنى واتفقنا
- طيب سيبى البيانات اللازمه فى الاستعلامات والحساب على الشباك وها نقدملك تخفيض 20% عشان المره الجايه تتعاملى معانا ( وغمز بعنيه ) ومتسأليش بره

( قصة جوز المتنيله على عنيها دى : بعد الجامعه طلع على دوله من دول الخليج قعد يشتغل زى الحمار عشرين سنه لما حس انه داخل على نص الاربيعينات قال لا مبدهاش الحق اتجوز قبل القطر ما يفوتنى بعت لاهله فى مصر يدوروله على عروسه وامه اختارتله الى بتتفق على قتله دى اكمنها جارتهم ولسه مخلصه دبلوم تجاره وكانت مخطوبه ومحصلش نصيب متعرفش امه بقه ان خطيبها سابها بعد ما شافلها لقطه على موبايل بالصدفه مع واحد صاحبه وصاحبه ده قاله انها مقضياها لمزاجها بس المهم نزل العريس يومين قبل الفرح مكنش عارف يسأل عليها ولا يقابل العيله والصحاب الى مشتاقين خلاصة القول اتجوزها وهوه عمره قد عمرها مرتين ونص قالك بس هى دى الى ها ترجعنى شباب تانى وسافرو سنتين الخليج والزن اشتغل على ودنه ما كفايه ونرجع بلدنا ورجعو وهوه لا شغله ولا مشغله غير شوية فلوس عمال يصرف منها وكل ما يروحو مكان يفتكروها بنته صاحبتنا اتخنقت قالتلك وانا عليا من ده بأيه ما اخلص منه واعيش حياتى وها تخلص منه .. هى مش لسه دفعه من فلوسه تمن قتله )

- هووووووووووووووووووف ... ادى الحريم ولا بلاش مش الصندل الى فى البيت .......... الى بعدوووووووو

- ايوه يا استاذ أأمر طلبك ايه
- عارف لو فعلا حققتلى طلبى ها اسيبك تطلب الى انته عاوزه
- قولى ايه الحكايه والتساهيل على المولى مهو عارف انى كل قصدى انى اخدم لا مكسب ولا دياوله
- اكيد اكيد ده حتى سمعتك سابقاك يا اما مكنوش سموك ابن الشياطين ، الحكايه انى عندى عماره بشطبها بس عليها قضيه و واقفين حالى لا انا عارف ابيع ولا اسلم الشقق للناس وكل ده عشان كانت مترخصه 5 ادوار وانا خلتهم 14 بزمتك مش دى اخرة الى يحاول يحل ازمة المساكن وبيساعد الشباب ها ألاقى الحل ولا ايه
- بس كده انتى قولتلى فى قضيه شغاله صح
- صح
- طيب والى يبوظهالك تدفعله كام
- يبقى صحيح ابن شياطين الى يعمل كده
- مهو ده اسمى يا بيه بس اعتبر الموضوع خلص والعماره اتشطبط والناس سكنت وبعد كام شهر وقعت كمان بس كده ده طلبك
- طيب فهمنى ها تعمل ايه
- اهو ده الى بيسموه اكل وبحلقه بس برده ها افهمك ورقه ولا ورقتين من ملف القضيه يختفو تبوظ القضيه وغرامه الف ولا الفين للموظف المسئول هى حسبة برمه يعنى
- مش لاقى رد
- ومش مطلوب رد البيانات والحساب على الشباك

وطلع صاحب المزاد تليفونه وطلب رقم ... ايوه يا ابو حسين اخبارك ايه واخبار حسين ايه مش عمل العمليه وبقى كويس الحمد لله ............ لا ياعم لا الفضل ليا ولا حاجه ما انا قولتلك اعتبر فلوس العمليه دى خدمه ها تردهالى يوم ما احتاجك ...... يا سيدى الامر لله وبعد ما تنفذ المطلوب تعالا خد وصل الامانه بتاعك ... لا التفاصيل لما تعدى عليا بالليل ..... اه اه فى نفس المكان ها استناك .. سلام

( قصة ابو حسين : موظف فى ارشيف محكمه محلتوش غير مرتبه ربنا كرمه بعيل بس اكتشف ان عنده ثقب فى القلب ولازم عمليه بعشرين الف جنيه يا الواد يموت .. لف على كل الى يعرفهم يستلف مفيش فايده ... حاول يعمل قرض قالوله لازم ضمنات تغطى المبلغ طيب ها يجيب منين دلوه على ابن الشياطين حكاله الموضوع وعرفه انه شغال فى المحكمه بمجرد ما عرف ابن الشياطين شغلته طلع الفلوس من الخزنه وقاله ده وصل امانه عشان محدش ضامن الموت من الحياه بس انا مش عاوزك تردهم انا ها اعتبرها خدمه ليك و وقت ما احتاج تردهالى ها اقولك تعالا خد وصل الامانه بتاعك ... وده الى حصل )

- الى بعده
- ايوه يا كابتن طلبك ايه
- بص يا نجم انا بقه عارف ان طلبى عندك اكيد
- يا كابتن قول انته بس والتساهيل على الله
- انا كنت خاطب بنت وبعدين هيه فسخت الخطوبه منغير ما تقولى فى ايه
- مش فاهم يا كابتن والمطلوب ايه
- ما انا جايلك فى الكلام اهوه مهى بعد ما فسخت الخطوبه انا ادايقت اوى منها والى دايقنى اكتر انها مش عاوزه تقولى السبب حرقت دمى منها لله كل الى انا عاوزه منك انك تعملها حاجه تخليها تكره حياتها مش مهم ايه المهم انها تدوق الى انا دوقته
- يعنى مش مهم انا ها اعمل ايه على قد ما المهم انك تحرق دمها والسلام
- بالظبط كده
- طيب مش عاوز بعد ما تحرق دمها وتجننها ترجعلك زاحفه على اديها ورجليها
- وده ممكن بجد .. ياريت ده انا بموت فيها ومقدرش اعيش من غيرها
- طيب هات ودنك بقه اقولك ها نعمل ايه ... بص يا كابتن هاتلى صوره ليها واحنا ها نركبلك صورتها على كام صوره من عندنا فى كام وضع مش ولابد ولو عاوز نحط صورتك انت كمان معاها مفيش مشكله بس هاتلنا صوره كامله ليك وليها عشان جسمكو فى الصوره يبقى قريب من الحقيقه
- اه اه وماله الصور معايا اهيه
- طيب سلم الصور والحساب على الشباك وارجع بكره خد الى اتفقنا عليه

( قصة الى ها يتفبركلها صور : بنت زى القمر والمغفل مش عارف انها بتجبه زى ما بيحبها ويمكن اكتر بس وهيه راجعه فى يوم البيت تلاته شباب نزلو جمبها من عربيه ورفعو عليها مطاوى وركبوها العربيه ... وطلعو على بيت واحد فيهم ودخلوها وهما مغمين عنيها واغتصبوها لمدة ست ساعات ولما خلصو غمو عنيها وخدوها فى العربيه وسابوها فى حته مقطوعه بعد ما قلبوها فى تليفونها ودهبها وخطيبها المغفل مش عارف انها كان ممكن متقولوش على الحكايه دى وبسهوله تخدعه بعمليه بسيطه ترجعها زى ما كانت وفى غشاء بكارة صينى مالى السوق ب 80 جنيه بس ...... بس اخلاقها متسمحلهاش انها تبتدى حياتها معاه بخداع .. يقوم يروح يتفق على طريقه يزلها بيها عشان يرجعها ليه والجزمه فوق دماغها )

- الى بعده

- والى بعده

- والى بعدهم .............

فى زمن انعدمت فيه الزمم وانمحت من وجوده الضمائر واصبحت الاخلاق للبيع لا تستعجب مما سبق فما يحدث فى الحقيقه لهو افظع من ذلك بكثير

ghost boy:

عدد المساهمات : 267 تاريخ التسجيل : 23/09/2009

darkred]]فى زمن انعدمت فيه الزمم وانمحت من وجوده الضمائر واصبحت الاخلاق للبيع لا تستعجب مما سبق فما يحدث فى الحقيقه لهو افظع من ذلك بكثير

عندك حق جوست بوي في جملتك الاخيره فعلا احنا في زمن عجب ربنا يستر علينا

موضوع حتي و لو طويل بس بجد مميززي العاده و كلو معاني و حكم .

غزالة البراري[/size]

مشكوره غزاله على مرورك الجميل اللى بيسعدنى دائما